02. PROIEKTUA BIDERATZEN (II)

Proiektatze prozesuan zehar atzera egiteko beharra izaten dugu zenbait momentutan. Beste norabide batzuk aztertu eta analisi horien emaitzak, ahal bada, proiektura aplikatu.

Kartulina eta artaziekin luzera eta zabalera desberdineko tirak egin ditugu, gure proiektuaren irudia gogora ekarriz. Helburua hasiera batean esperimentatzea besterik ez da.

Saiakera desberdinen ostean, proiektuan izan dezakeen aplikazio maila aztertu dugu. Bi mailen arteko lotura estutzea da helburu nagusia, eraikinaren sekzioak osatu, izaera desberdineko funtzioak banatzeko soluzioak bilatu, sentsazio ezberdineko guneak sortu… espazioa aberastu azken batean.

02. PROIEKTUA BIDERATZEN (I)

Astearteko eskolan agindutako laburpen laminaren harira, blogean orain arteko ideiak ordenatzea erabaki dugu. Aurreko sarreran esan bezala, funtzio aniztasunak eta inguruko elementuak josi nahiak, proiektua ibilbide baten modura ulertzera eraman gaitu. Bidearen ideia hori irudikatzeko, paseoa astintzeko erabakia hartu dugu. Helburua, funtzio desberdinak txertatzeko guneak sortu, euren arteko loturak bilatu, proiektuaren izadia adieraziko duen irudiaren bila abiatu.

Eskuhartzeak, aparkalekuen luzera osoa hartzen du. Honez gain, urruneko ikuspegi aberatsago baten bila, proiektuak, paseoaren mugaren norabidea aldatzen du. Aurreko hare-muinoak desbideraketa hori egitera behartzen gaitu.

Programaren interpretazioa egin eta erlazio-diagramak osatu ostean, behe- eta goi - mailako distribuzioen lehen trazak irudikatu ditugu. Bi prozesuak aldi berean eraman ditugu aurrera, euren arteko erlazioak berebiziko garrantzia baitu. Honakoa lan horien sintesia:

-Hondartza maila, -1: Hondartzara zuzendutako korridore ireki batek lotzen ditu behekaldeko, igerilekuarekin erlazionatutako, funtzio guztiak. Izaera itxiko (komunak, aldagelak) zein izaera irekiko (alokairu zerbitzuak) osagaiak tartekatzen dira, bidearen helmuga igerilekua izanik. Aldi berean, igerilekua behe- zein goi-mailan barneratzea, horiekin nahastea, dugu helburu.

-Kale maila, 0: Zerrenda jarrai batek osatzen du kale mailako eskuhartzea. Funtzio ezberdinak lotzen ditu. Tarteka eten egiten da, behekaldeko espazioarekin erlazionatzeko asmoz. Helburua, izaera desberdineko guneak sortzea da, bestelako sentsazioak biltzea horietako bakoitzean.

Goikalde eta behekaldeko plataformek, zoruek, ez dute euren artean bat egiten. Bakoitzak bere bidea jarraitzen du. Erlazio bisualek eta iluminazio kontuek zehaztuko dute sartu-irten horien kokalekua.

Bi mailen arteko erlazioa estutzea izango da hurrengo pausoetako helburu nagusia. Elementu artikulatzaile moduan funtzionatzen duten eskailera eta harmailek eginbide horretan laguntzen digute; halere, ez dugu aski horrekin. Multzo baten modura ulertu behar da proiektua. Gure lana, hori lortzeko baliabideak topatzea izango da.

Eten bat egin eta atzera bueltatzeko unea da.

01. HASTAPENAK

Inguruaren azterketak alde batera utzi ditugu jada. Prozesuan zehar atzera egin beharko dugu zenbait momentutan, analisi horietara bueltatu, proiekturako baliagarriak izan daitezkeen datuen bila abiatu. Halere, ariketari ekiteko unea iritsi da. Beste ezer egiten hasi aurretik Andonik eta nik, proiektuaren asmo nagusiak finkatzea erabaki dugu. Zer da gure proiektuarekin lortu nahi duguna? Zein proiektu mota eraman nahi dugu aurrera? Galdera horien erantzunen bila abiatu gara proiektuaren haserako oinarriak ezartzeko asmoz.

1-Inguruaren aurka egin baino, berarekin bat egiten duen proiektua eraiki nahi dugu. Joera horizontala duen eraikina; bertikaltasuna, izaera deigarriak alde batera utzi. 

2-Inguruak biltzen dituen elementuak josteko baliabide gisa ikusten dugu gure proiektua. Eraikina paseotik hondartzarako bidea litzateke. Bien arteko lotura, elkarrizketa.

3-Urruneko ikuspegiaren garrantzia azpimarratu nahi dugu. Nora begiratzen du eraikinak, nora bideratu nahi dugu. Hurrengo pausoetan kontuan hartu beharrekoa.

Lehen hausnarketak alde batera utzita, proposatutako programa aztertzea erabaki dugu. Proiektua abiatzeko tresna moduan, programako elementu desberdinen interpretazioa egin dugu, haserako erlazioak ezarriz. Honakoak lirateke, analisi horien eskema eta ondorio nagusiak:

1-Bi mailatan bereizitako proiektua. Batetik urarekin loturiko ekintzak eta bestetik kale mailan bete beharrekoak. 

2-Terraza bi maila, bi izaera horiek lotzeko giltza. 

3-Jatetxea eta tabernak sukaldea elkarbanatzeko aukera planteatu.

4-Jatetxea beste funtzioetatik bereizi, isolatu. Beste izaera bateko elementua.

5-Taberna eta terrazaren arteko lotura. Taberna hondartzara gerturatzeko bidea.

6-Igerilekura bideratutako programa.

 

 Funtzio aniztasunak eta inguruko elementuak lotu nahiak, proiektua ibilbide gisa ulertzera eraman gaitu. Gertaera desberdinak ematen diren ibilbidea. Funtzio ezberdinak lotzeko gailua. Paseotik hondartzara igarotzeko tresna. Izaera irekia duen proiektua, eskuragarria. 

Nola ekin bide horri? Paseoa nolabait astintzen, hausten, bertan aurrera eta atzera eginez.  Paseoaren muga moldatuz, funtzio desberdinak txertatzeko txokoak sortu ditzazkegu, baita euren artean loturak ezartzeko bideak aurkitu ere. Paseoa hondartzara bideratzeko tresna izan daiteke. Proiektuari izaera emango dion irudia lortzeko aukera. Urruneko ikuspegiari heltzeko bidea ere bada. Aurrean dugun muinoa, oztopo bisuala ikusita, proiektua beste aldera bideratu dezakegu, ikuspegia aberatsago izan dadin. Halere, paseoaren sartu-irten horiek helburu zehatz batekin irudikatu behar dira, buruan asmo bat izanik betiere.

Horiek lirateke aurreko astean azaldutako lehen ideiak, proiektuari ekiteko lehen bideak. Hurrengo pausoak beste sarrera batean azalduko ditugu.

00. URDAIBAI. EREMUAREN INTERPRETAZIOA

Hasierako urrats hauetan, gure lana eremua aztertu, ulertu eta interpretatzea izan da. Orrialde honetan, helburua, plano geografikoak ematen ez duen informazioa erakustea.

Plano berri bat sortu dugu. Horretarako oinarria, Urdaibaiko eremua osatzen duten herrien arteko denbora tartea izan da. Bukaerako emaitza ez dator bat eskura dugun plano geografikoarekin. Lortutako irudia beste bat da. Ez da errealagoa; ezta irrealagoa ere. Desberdina, besterik ez. Urdaibaiko eremua beste ikuspegi batetik aztertzea erabaki dugu. Honetaz gain, interpretazio lan honetan, beste faktore batzuk isladatzen ahalegindu gara: herrien izaera, eremuan duten funtsa, euren arteko loturak… baita erlazio bisualak ere.

Gerora baliagarria izan daitekeen informazioa bildu dugu; asmoaren arabera, proiektuari heltzeko oinarri izan daitekeena. Lehen urratsa bete dugu… eskua askatzeko unea iristen ari da.

MIRÓ-KERIAK

Kursaaleko Kubo-kutxa aretoak, udan, Joan Miróri eskainitako erakusketari amaiera emango zaio aste honetan. Kideren batek aipatu bezala, hura bisitatu genuen aurrekoan, eta bloga jada martxan dugunez, gogoeta labur bat idaztea erabaki dut.

Erakusketak 1908tik 1981era bitarteko hainbat obra dakarzkigu, Miró Mallorcan bizi izandako garaiari atentzio berezia eskainiz. Artista berezia dugu katalana. Herri, toki desberdinetan ibilitakoa. Artista, korronte, mugimendu desberdinetatik ikasitakoa. Halere, ausardiaz, bere bidea eraiki zuen Mirók. Berezko estilo bat bilatu, aurkitu, eta horretan sakondu.

Iturri desberdinetatik ikasi, ezagutza handitu, eta ostean, bakoitzak bere bidea eraiki. Hura da bidea.